Ecclesiastes 1
Holesok Xil Vus te Meulien be Neta Votei Tang
Eklisiastes 1:1-11
1Sepinien xil ak be sepinien na Moletin te Pispisien, xa be suv toto e taon tahal Serusalem, e horamue na Deved.2Moletin te Pispisien di biteni bit,
“Di rapol votei, ma di rapol votei.
Reitin, holesok xil vus xa di rapol ni e meulien nar mei ihe neta votei tang.”
3Melengien xil vus e meulien nam di okon ni polien,
ma ukamet naha e hoxalite teni? Maten tang.
4Tetit moletin xil di lamei e di lalel, e tetit moletin sav xil mei di langgoles vonine,
e ut etan dat nggoni ngan vehakut, taviles ti.
5E melengien xil vus, eai di mea e miloh ba vuma ... ba minu.
Di, mitemanon mun mei be rute xa temea en.
6Votiang mun, toio bemei ba, aru bemei ba,
dit lukapis, lukapis ba vuma ... ludilomun lube vonealu.
7Oei xil mileh mei be tas, e tas misakras vapolu ni.
Oei di mea rilomun mei be us e mus be tan, di, mileh rilomun mei be tas.
8Holesok xil vus di lasak xa di lasak ba vuma ... neta tovuol vahiles.
Nalonge veok buol tova tang ni sexien xil ak e nasakras mun namit ti neta.
Mete xir di miketeh e di miketeh ba vuma ... e bit ti mu vaketeh ti.
Vurange xir di miteong e di miteong ba vuma ... e bit ti mu vateong ti.
9Holesok xil vus xa latestal kokot, mei listal rilomun.
E neta xa moletin tei tepol ni ngamu, moletin sav mei ipol ni ixoni tang.
E ut xil vus e ut etan, neta tovuol vahe neta hu.
10?Midep? Neta tova da xa moletin mikila isep usili ihit, “Mupus ti, ngan ak be neta hu.”
E-e, testal ngamu tetiamu e melele xa latnapes xir ti mu.
11Moletin ti te xosali ak en namese ni naha xa testal tetiamu.
E moletin xil xa limei itutou ni xir, linanem ti usil naha xa di mistal taxeak e ti iha.
Copyright information for
TVK